નોઈડાના ગામમાં ઈમારતમાં લાગેલી આગમાં બેના મોત, મકાનમાલિકની ધરપકડ

નોઈડા ( 15 જુલાઈ ) નોઈડાના એક ગામમાં બુધવારે એક બહુમાળી ઈમારતમાં આગ લાગી હતી, જેમાં બે લોકોના મોત થયા હતા એમ પોલીસે જણાવ્યું હતું. લગભગ 50 લોકોને બચાવી લેવામાં આવ્યા હતા. એક પુરુષ અને એક મહિલાને ધુમાડો શ્વાસમાં લીધા બાદ હોસ્પિટલમાં લઈ જવામાં આવ્યા હતા પરંતુ તેમને બચાવવા માટે ખૂબ મોડું થઈ ગયું હતું. સેક્ટર 66ના મામુરા ગામમાં ગ્રાઉન્ડ પ્લસ ફોર બિલ્ડિંગમાં અનેક પરિવારો ભાડૂતો તરીકે રહે છે. મકાનમાલિકની ધરપકડ કરવામાં આવી છે. સંયુક્ત પોલીસ કમિશનર રાજીવ મિશ્રાએ જણાવ્યું હતું કે, ઇમારતની અંદર ઇલેક્ટ્રિક ટુ - વ્હીલરને ચાર્જ કરવામાં આવતા આગ ફાટી નીકળી હોવાનું જણાય છે. તે પરિસરમાં પાર્ક કરેલા નજીકના પેટ્રોલ સંચાલિત ટુ - વ્હીલર્સમાં ફેલાઈ ગઈ હતી. આગની જાણ થયા પછી તરત જ હાઇડ્રોલિક પ્લેટફોર્મ સહિત ફાયર ટેન્ડર સ્થળ પર રવાના કરવામાં આવ્યા હતા અને મોટાભાગના રહેવાસીઓને સુરક્ષિત રીતે બહાર કાઢવામાં આવ્યા હતા. " પહેલેથી જ સ્વાસ્થ્ય સંબંધિત સમસ્યાઓથી પીડાતા બે લોકો ધુમાડો શ્વાસમાં લીધા બાદ બીમાર પડ્યા હતા અને તેમને એમ્બ્યુલન્સ દ્વારા જિલ્લા હોસ્પિટલમાં ખસેડવામાં આવ્યા હતા " એમ મિશ્રાએ પત્રકારોને જણાવ્યું હતું.