મધ્યપ્રદેશમાં દતિયા પેટાચૂંટણી માટે ભાજપે આશુતોષ તિવારીને મેદાનમાં ઉતાર્યા, પીઢ નરોત્તમ મિશ્રાને આંચકો

ભોપાલઃ સત્તાધારી ભાજપે શુક્રવારે મધ્યપ્રદેશમાં 30 જુલાઈના રોજ યોજાનારી દતિયા વિધાનસભાની પેટાચૂંટણી માટે આશુતોષ તિવારીની ઉમેદવારીની જાહેરાત કરી હતી. આ નિર્ણયને વરિષ્ઠ નેતા અને પૂર્વ મંત્રી નરોત્તમ મિશ્રા માટે આંચકા તરીકે જોવામાં આવી રહ્યો છે, જેમણે પક્ષના સૂત્રોના જણાવ્યા અનુસાર ટિકિટની અપેક્ષા રાખી હતી અને નામાંકન પત્ર પણ ખરીદ્યું હતું. દતિયાના સેવદા નગરનો રહેવાસી તિવારી રાજ્ય ભાજપ સંગઠનમાં સક્રિય છે તેમ સૂત્રોએ જણાવ્યું હતું. કોંગ્રેસ નેતા રાજેન્દ્ર ભારતીએ 2023ની વિધાનસભા ચૂંટણીમાં દતિયાથી તત્કાલીન ગૃહમંત્રી નરોત્તમ મિશ્રાને 7,500થી વધુ મતોથી હરાવ્યા હતા. જોકે દિલ્હીની એક અદાલતે આ વર્ષે એપ્રિલમાં ભારતીને છેતરપિંડીના કેસમાં ત્રણ વર્ષની જેલની સજા સંભળાવી હતી, જેના કારણે તેમને ધારાસભ્ય તરીકે ગેરલાયક ઠેરવવામાં આવ્યા હતા અને પેટાચૂંટણીની જરૂર પડી હતી. ભારતીને જામીન મળી ગયા છે. ભારતના ચૂંટણી પંચે તાજેતરમાં દતિયા સહિત દેશની ત્રણ વિધાનસભા બેઠકો પર પેટાચૂંટણીના કાર્યક્રમની જાહેરાત કરી હતી. અન્ય બે બેઠકો બિહાર અને ગુજરાતમાં છે. જ્યારે 30 જુલાઈના રોજ મતદાન થશે. પરિણામ 3 ઓગસ્ટે જાહેર કરવામાં આવશે.