બિહારઃ બંટી યાદવ અપહરણ - હત્યા કેસમાં મુખ્ય આરોપી પોલીસ એન્કાઉન્ટરમાં ઘાયલ

પટનાઃ બિહારના પટના જિલ્લામાં બંટી યાદવના અપહરણ અને હત્યાનો મુખ્ય આરોપી ગુરુવારે પોલીસ સાથે ગોળીબારમાં ઘાયલ થયો હોવાનું અધિકારીઓએ જણાવ્યું હતું. 6 જુલાઈના રોજ યાદવના કથિત અપહરણ બાદથી આરોપી રવિશ ફરાર હતો. પટણાના એસએસપી કાર્તિકેય કે શર્માએ જણાવ્યું હતું કે, રવિશ હોડી દ્વારા મુસાફરી કરી રહ્યો છે અને નેપાળ જઈ રહ્યો છે તેવી માહિતી મળ્યા બાદ પોલીસે ગુપ્ત માહિતીના આધારે ઘણા નદી ઘાટ પર નજર રાખી હતી. " જ્યારે તે એક ઘાટ પર પહોંચ્યો અને તેને અટકાવવામાં આવ્યો ત્યારે તેણે પોલીસ પર ગોળીબાર શરૂ કરી દીધો. તેના દ્વારા ચલાવવામાં આવેલી ગોળીઓમાંથી એક પોલીસના વાહનને અથડાઇ હતી " એમ શર્માએ જણાવ્યું હતું. પોલીસે વળતો જવાબ આપતા રવિશને પગમાં ઈજા પહોંચી હતી. તેને હોસ્પિટલમાં લઈ જવામાં આવ્યો હતો અને તે ખતરાની બહાર છે એમ એસએસપીએ જણાવ્યું હતું. આરોપી દ્વારા ગોળીબાર દરમિયાન કથિત રીતે ઉપયોગમાં લેવાતા હથિયારને જપ્ત કરી લેવામાં આવ્યું છે અને તેની સારવાર બાદ આગળની કાનૂની કાર્યવાહી કરવામાં આવશે. બંટી યાદવનું કથિત રીતે 6 જુલાઈના રોજ અપહરણ કરવામાં આવ્યું હતું. 12 જુલાઈના રોજ પટણાના આઠમલગોલા વિસ્તારમાંથી તેનો સડી ગયેલો મૃતદેહ મળી આવ્યો હતો. એસએસપીએ જણાવ્યું હતું કે અપહરણ અને હત્યા ગેરકાયદેસર દારૂના વેપારમાં સામેલ ગેંગ વચ્ચે વર્ચસ્વ માટેની દુશ્મનાવટ સાથે જોડાયેલી હોવાનું જણાય છે. રવિશને અગાઉ દારૂ સંબંધિત કેસમાં જેલમાં ધકેલી દેવામાં આવ્યો હતો અને તેની અને અન્ય વ્યક્તિ વચ્ચેના મતભેદોને કારણે આ ઘટના બની હોવાનું માનવામાં આવે છે. પોલીસે જણાવ્યું હતું કે આ કેસમાં અન્ય ચાર લોકો પણ સામેલ હતા અને તેમની ધરપકડ કરવાના પ્રયાસો ચાલી રહ્યા છે.