અમૃત ભારત યોજનાઃ પીએમ મોદીએ ગુજરાતમાં ચાર પુનર્વિકસિત રેલવે સ્ટેશનોનું વર્ચ્યુઅલ ઉદ્ઘાટન કર્યું

પ્રધાનમંત્રી શ્રી નરેન્દ્ર મોદીએ શુક્રવારે ગુજરાતમાં પ્રતાપનગર - ગોધરા - પોરબંદર અને ભક્તિનગર રેલ્વે સ્ટેશનોનું વર્ચ્યુઅલ ઉદ્ઘાટન કર્યું હતું, જે અમૃત ભારત સ્ટેશન યોજના હેઠળ રૂ. 109 કરોડનાં રોકાણ સાથે પુનઃવિકસિત કરવામાં આવ્યાં છે. આ દેશભરમાં આવા 75 પુનર્વિકસિત રેલવે સ્ટેશનોમાંનું એક છે જેને પ્રધાનમંત્રીએ આ યોજના હેઠળ સમર્પિત કર્યું હતું, જે ભારતીય રેલવેના આધુનિકીકરણમાં વધુ એક સીમાચિહ્નરૂપ છે. મુખ્યમંત્રી ભૂપેન્દ્ર પટેલ વડોદરા વિભાગ હેઠળના પ્રતાપનગર રેલવે સ્ટેશન પર યોજાયેલા ઉદ્ઘાટન સમારોહમાં જોડાયા હતા. તેમણે અત્યાધુનિક સુવિધાઓ સાથે તેના પરિવર્તનને પ્રકાશિત કરતા વિશેષ પ્રદર્શનની પણ મુલાકાત લીધી હતી. " અમૃત ભારત સ્ટેશન યોજના હેઠળ રાષ્ટ્રને સમર્પિત વધુ ચાર રેલવે સ્ટેશનો - પ્રતાપનગર ભક્તિનગર પોરબંદર અને ગોધરા સાથે ગુજરાતમાં હવે 22 પુનઃવિકસિત અમૃત ભારત સ્ટેશનો છે. ઉલ્લેખનીય છે કે, મોદીએ અગાઉ ગયા વર્ષે મે મહિનામાં રાજ્યમાં 18 પુનર્વિકસિત રેલવે સ્ટેશનોનું ઉદ્ઘાટન કર્યું હતું. સમગ્ર ગુજરાતમાં વધુ 87 રેલવે સ્ટેશનો હાલમાં પુનર્વિકાસ હેઠળ છે, જે રેલવે માળખાને મજબૂત કરવા અને ભારતના રેલવે આધુનિકીકરણ મિશનને ટેકો આપવા માટે રાજ્યની સતત પ્રતિબદ્ધતાને પ્રતિબિંબિત કરે છે.