જમ્મુ - કાશ્મીરના રામબનમાં ટ્રક ખીણમાં ખાબકતા 2નાં મોત

બનિહાલ / જમ્મુ 30 મે ( પી. ટી. આઈ. ) શનિવારે રામબન જિલ્લામાં જમ્મુ - શ્રીનગર રાષ્ટ્રીય ધોરીમાર્ગ પર એક ટ્રક ઊંડી ખીણમાં પડી ગઈ અને તેમાં આગ લાગી જતાં બે લોકોના મોત થયા હોવાનું અધિકારીઓએ જણાવ્યું હતું. આ અકસ્માત રામસૂ વિસ્તારમાં ગંગરૂ નજીક થયો હતો. પોલીસના જણાવ્યા અનુસાર ચૂનાના પત્થરોને લઈ જતી ટ્રક જમ્મુથી શ્રીનગર જઈ રહી હતી ત્યારે ડ્રાઈવરે કથિત રીતે ગંગરૂ નજીક વાહન પરનું નિયંત્રણ ગુમાવી દીધું હતું. ટ્રક ખીણમાં ખાબકી ગઈ હતી અને તેમાં આગ લાગી હતી. રામસૂ પોલીસ સ્ટેશનની હિમાલયન ક્વિક રિસ્પોન્સ ટીમ ( ક્યુ. આર. ટી. ) સીઆરપીએફ અને ફાયર એન્ડ ઇમર્જન્સી સર્વિસિસની ટીમો સ્થળ પર પહોંચી હતી અને બચાવ કામગીરી શરૂ કરી હતી. અધિકારીઓએ જણાવ્યું હતું કે બચાવકર્મીઓ ઘટના સ્થળે પહોંચ્યા ત્યારે વાહન પહેલેથી જ આગમાં બળીને ખાખ થઈ ગયું હતું. ઓપરેશન દરમિયાન ટ્રકના સળગેલા કેબિનમાંથી ડ્રાઇવર અને તેના સહાયકના મૃતદેહો મળી આવ્યા હતા. મૃતદેહો આંશિક રીતે બળી ગયેલી સ્થિતિમાં મળી આવ્યા હતા એમ અધિકારીઓએ જણાવ્યું હતું અને ઉમેર્યું હતું કે આગમાં ટ્રક સંપૂર્ણપણે નાશ પામી હતી. પોલીસે આ ઘટનાની નોંધ લીધી છે અને તપાસ શરૂ કરી છે એમ અધિકારીઓએ જણાવ્યું હતું.